Denne biletboka gjenfortel segna om Hallvard som levde på slutten av 1600-talet. Ho handlar om den fattige og dugande smeden Hallvard som støyper eigne pengar og derfor må rømme frå heimbygda si i Hardanger. Forviklingane er mange, og Hallvard held på å miste livet då han er fange og silkevevar hos ein slavehandlar i Konstantinopel. Men han kjem seg heim att med gullpengar innsydde i kleda og ein bit av silkeveven. Det er ei fantasieggjande og mangfaldig historie som blir gjenfortalt gjennom bilete og tekst. Språket er neddempa og nøkternt, og slik blir den gamle tonen frå segna tatt vare på. Bileta er vakre, utført i dempa og metta fargar. Dei er med på å utdjupa handlingselementa i forteljinga. Gjennom dei blir og den historiske dimensjonen forsterka. Eide, 2002.
